tg-me.com/lukmanbdran1970/4256
Last Update:
يَكهف الحَيارى
دَمعنه ايتِجَاره
على الشيبه الشريفه
وعلى الراس ونَزيفه
دَمعنه ايتِجَاره
***
علي فاروق الله ابسَاحة المَحشَر
علي ساقي العِطاشى ابمَنبع الكوثر
ياحيف انسِـﮔـه بكاس الحَتِف الاحمَر
ورَاسه انطَـر ﮔبل فجر الله لاينطَـر
سِمعنه ودِعينه
يبَطل ونينه
ويشِع بالدنيه طَيفه
على الشيبه الشريفه
** *
حَياره ابفَـﮔـده صِرنه امتَيّهين الراي
بكل خِطـوه التعثّر والتعَـب حـدّاي
صَحره بلا مَتاع اوشَح عَلينه الماي
يـﭼـوينه الهَـجير ومانِلاﮔي افيَاي
تِعبنه يغالي
وسَهر هالليالي
أخَذ مِن عِدنه حَيفه
على الشيبه الشريفه
** *
المَناير دَنـﮔت تبـﭼي ابحِـزن وابهَم
ومِحراب الصلاه بلّل تُرابه الـدَم
مخ رَاسه اختِلط وَسفه بنَجيع السم
وسِـبحته اتـﮔطعَت وابداً فـلا تِلتم
وطبيبه ينادي
يَاسَم الأعادي
مِشه ابجسمَه اعلى كِيفه
على الشيبه الشريفه
** *
الشـيعه اتجَمّعـت عالبـاب مَلهوفه
لِسن خَرسه وﭼٍفوف الحِيله مَـﭼتوفه
الوَضـع مثل اليتـامه ايبـﭼـي ليشُوفه
عِيون امدَمعــه اوبوجُـوه مَخطوفه
سِندنه اوّلينه
اعلى بَابه اجينه
وبـﭼينه احنه ابمضِيفه
على الشيبه الشريفه
** *
علي سَـاجد إجه الدنيه وطلَع ساجد
وبين الكعبـه والمَسجد وَضـع واحد
جَبين اعلى الارض مِتهجّـد وعَـابد
اويّه القـبله ظل كِل عمـره مِتواعد
خِذاها ابجَداره
وكِسبها الصَداره
وشِهَد لافعَاله سيفه
على الشيبه الشريفه
==============
لقمان البدران
BY الشاعر لقمان بدران
Warning: Undefined variable $i in /var/www/tg-me/post.php on line 283
Share with your friend now:
tg-me.com/lukmanbdran1970/4256